حضرت علیشیر نوایی

- 579 -ییللیگی

کؤزونگ سرفِتنه‌ یی عالم توشوپتور،

قاشینگدېک بیر ینگی آی کم توشوپتور.

سېپیبسېنمو گلاب اول یوزگه یاخود

گُلی سوري اوزه شبنم توشوپتور.

کؤنگوللر زخمیدین سالیب چېکرگه،

مگر قاشینگ اوچیغه خَم توشوپتور.

لبینگ هجرینده بغریمدین بارور قان،

مگر اول زخمدین مرهم توشوپتور.

اېمس یېلدینکی سَیری باغ اېترده

ایاغینگغه سومن گُل هم توشوپتور.

ایتینگ سینغن صفالیده می ایچسه‌م،

نې تانگ ایلگیمگه جامی جمع‌ توشوپتور.

نوايی نی قاووب ایستر رقیبین،

گدا محروم و ایت محرم توشوپتور.

2020/02/07

***

ظهیرالدین محمد میرزا بابور

- 537 - ییللیگی

- بابور- (BOBUR-БОБУР )

کؤنگلیمنی چو اول پری آلیبتور ،
دیوانه بؤلورغه نی قالیبتور ؟!

بیدیل ایکنیمنی ایمدی بیلگه ی ،
چون بیرکیشی کؤنگلینی آلیبتور.

کؤنگلیمنی آلیب ، تغافُلین کؤر ،
بیلمسگه اؤزینی نی سالیبتور .

زُلفونگ چیریگینی ییغکی، جمعی ،
بو فیتنه دین اسرو قؤزغالیبتور .

بابور ، نیچه کون کؤنگولین خوش توت ،
بوعالم ایشی چون منقلیبتور .

2020/02/07