ظهیرالدین محمد میرزا بابور 
- 537 - ییللیگی 

قرا زلفونگ فراقیده پریشان رؤزگاریم بار ،
یوزونگنونگ اشتیاقیده نی صبر نی قراریم بار .

لبینگ بغریمنی قان قیلدی ، کؤزیمدین قان روان قیلدی ، 
نیگه حالیم یامان قیلدی ، مین آندین بیر سؤراریم بار .

جهاندین منگه غم بؤلسه ، اولوسدین گر الم بؤلسه ، 
نی غم یوز مونچه هم بؤلسه ، سینینگدیک غمگساریم بار .

اگر مصلح مین ، ار مفسد و گر عاشق مین ، ار عابد ، 
نی ایشینگ بار سینینگ ، زاهد ، مینینگکی اختیاریم بار .

فغانیم آشتی بلبلدین ، غمی یؤق ذره بو قولدین ، 
بسی ، بابور ، اؤشل گلدین کؤنگولده خار-خاریم بار .

2020/02/05