گبریېل گارسیا مرکېس. کونلر نینگ بیریده
(حکایه)
یاغاینگهرچیلیکسیز کېلگن ایلیق دوشنبه تانگی هم اۉتدی. او قدَر یوقاری ملَکهلی بۉلمهگن تیش دوکتوری اورېلیا اېسکاوېر جوده اېرته اویغآنیب، ساعت آلتیده آفیسینی آچدی. او هنوزگچه شکل بېریلیشینی کوتیب یاتگن ناتۉغری تیشلرنی شیشه ایدیش ایچیدن آلیب پلستر قالبگه سالیب کۉره باشلهدی. کۉرسهتیلگن ترتیب بۉییچه ایشلش اوچون اۉلچاو اسبابلرینی چوکی اوستیگه قۉیدی. او یاقهسیز یۉل-یۉل کۉیلک کيیب آلگن، بۉینی طلا علمهتوگمه بیلن یاپیلگن و بونگه قۉشیمچه روشده باغیچلی باغلهمه تقیب آلگنی اوچون نفسی نهق بۉغیلیب قالهیازگندېک اېدی. او قد-قامتی تیک و آزغایندن کېلگن بۉلیب، شو کۉرینیشیده بیر نهعوی کر-ساقاو آدمدېک تهعسورات قالدیرردی. او عادتده نرسهلرینی ترتیبگه سالهیاتگنیده، تیش دریلینی دېنتهل مېز یانیگه ایتریب بارر و ناتۉغری تیشلرگه او بیلن سیقل بېرردی. گرچه او کۉرینیشیدن هېچ نرسهنی اۉیلهمهیاتگندېک تویولر، تیش دریلی اونگه کېرهک بۉلمهگنده هم اونی آیاقلری بیلن تۉختاووسیز باسیب ایشلهتردی.
ساعت سکّیزدن اۉتگندهگینه دېرَزهدن آسمانگه تیکیلیش اوچون آزگینه وقت ایشینی تا‘ختهتدی. تشقریگه افتاده باقرکن، قۉشنی اوی اېشیگی یوقاریسیده قویاش تفتیده اۉزینی قوریتهیاتگندېک اۉیچن تورگن ایکّیته بورگوتگه کۉزی توشدی. افتیدن توشدن کېین ینه یامغیر یاغسه کېرهک دېگن اۉیده او ایشینی دوام اېتتیره باشلهدی. اۉن بیر یاشلی اۉغلی چینقیراق آواز بیلن اونی فکریدن چلغیتدی:
– آته!!!
– نیمه؟
– مایور، سیز اونی تیشینی آلیب قۉیه آلهسیزمی یاکه یۉقمی، شونی بیلماقچیلر؟
– مېنی بو یېرده اېمسلر دېب ایت.
اورېلیا اېسکاوېر طلا تیشگه آرا بېرهیاتگن اېدی. او تیشنی قۉلیده اوشلب توریب یریم یاپیق کۉز بیلن تېکشیرردی. شو پیت اۉغلی نریگی خانهدن ینه قیچقیریب کېلدی.
– اولر ایتدیکی، سیز شو یېرده اېکنسیز، چونکه، آوازینگیزنی اېشیتیبدیلر.
او بیر مدتگه تیشنی تېکشیریب توردی. ایشینی توگهتگندن سۉنگ، قۉلیدهگیلرنی چوکی اوستیگه قۉیدی-ده، دېدی:
– جوده یخشی بۉلیبدی-ده.
اورېلیا اېسکاوېر تیش دریلینی ینه قَیته ایشلهته باشلهدی. نرسهلرینی سهقلهیدیگن جوان قوتیسی ایچیدن بیر نېچه بۉلهک بریدج آلدی و ینه طلا تیشگه سیقل بېریشنی دوام اېتتیردی.
– آته!
– ینه نیمه؟..
– اولر حلی هم اۉز فکرلرینی اۉزگرتیرمهدیلر، – سۉزینی دوام اېتدی باله. – اولر ایتهدیلرکی، اگر سیز اولر نینگ تیشینی آلیب قۉیمسهنگیز، سیزنی آتیب تشلر اېکنلر.
او شاشیلمسدن مطلقا باسیقلیک بیلن جاییدن قۉزغآلیب تیش دریلی نینگ پایدلینی باسیشنی تا‘ختهتدی و اونی مېزدن نریراق سوریب یۉلدن همه نرسهنی آلیب تشلهدی. سۉنگ خانه نینگ اۉرتهسیده توریب آلدیده اۉغلیگه قرهب دېدی:
– یخشی. ایت، اولرگه کیریب مېنی آتسینلر.
او جوان چېتیگه بیر قۉلی بیلن سویهنیب، بیر قۉلیده اېشیک قرشیسیدهگی مېزنی ایلنتیریب تورردی. مایور اېشیک آستانهسیده پیدا بۉلدی. اونی یوزینی چپ طرفینی سقالی آلینگن، باشقه طرفی اېسه عکسینچه، آغریقدن شیشگن و چمهسی بېش کونلیک آلینمهگن سقالده اېدی. اورېلیا اېسکاوېر اونینگ مأیوس کۉزلریدن او اوزاق تونلرنی آغریق بیلن اۉتکزگنلیگینی کۉردی. او جواننی برماقلری بیلن یاپرکن، ملایملیک بیلن:
– اۉتیرینگ، – دېدی.
– خیرلی کون! – دېدی مایور.
– خیرلی کون، – ایستهمهیگینه جواب قیلدی او.
کېرهکلی اسبابلر استېریلیزهتسیه اوچون قَینهیاتگن وقتده، مایور اۉریندیق نینگ باش قۉیهدیگن جاییگه باشینی قۉییب اۉرنهشیب آلدی و اۉزینی بیرآز یخشیراق حس قیلگندېک بۉلدی، اما حلی-همان ساووق نفس آلهردی. او اورېلیا اېسکاوېر نینگ آفیسیگه کۉز یوگورتیردی. یاغاچدن یهسهلگن اۉریندیق، آیاق بیلن باسیب ایشلهتیلهدیگن تیش دریلی، کېرهمیکهدن بوتللر و شیشه ایدیشلر، همه-همهسی جوده اېسکیرگن اېدی. اۉریندیق قرشیسیده یېلکهگچه اوزونلیکده توتیلگن اېسکی متاع پرده تورردی. مایور، دوکتور یقینلشهیاتگنینی کۉریب، آغزینی ییرتگودېک آچدی. اورېلیا اېسکاوېر اونی باشینی چیراق طرفگه بوردی. اینفېکتسيه توشگن تیشنی یخشیلب تېکشیرگهچ، احتیاطکارلیک بیلن قۉلینی بوکیب، مایور نینگ جغینی یاپرکن:
– انیستېزيهسیز بۉلهدی، – دېدی.
– نیمه اوچون؟..
– چونکه سیزده مدّهلهگن جای بار.
– توشونرلی، – دېدی مایور دوکتور نینگ کۉزلریگه قرهب و کولیشگه حرکت قیلدی.
اورېلیا اېسکاوېر بۉلسه، اونگه ایلجهییب هم قۉیمهدی. او ایش چوکییدن ستیریللنیب بۉلگن اسبابلرنی آلیب کېلیب، قَیناق سوو ایچیدن بیر جُفت قیقیچنی آلدی. او اۉز ایشینی شاشمسدن خاطرجمعلیک بیلن بجرردی. آیاق کییمینی اوچی بیلن توفداننی مایورگه یقینراق جایگه ایتریب یوباررکن، قۉلینی یوویش اوچون تگیگه چیناق قۉییلگن جۉمرهک یانیگه باردی. او ایشلرینی همهسینی عادتي خاطرجمعلیکده، حتا مایور نینگ یوزیگه هم قرهمهگن حالده بجرردی. بیراق مایور اوندن کۉز اوزگنی یۉق اېدی.
بېمار نینگ آغرياتگن تیشی کېچ نیش اورگن عقل تیشی بۉلیب چیقدی. دوکتور آیاقلرینی سَل آچیب، ایسّیق قیقیچ بیلن آغریق تیشنی قیسدی. مایور اۉریندیق توتقیچینی محکم اوشلب آلیب، آیاقلریده بوتون کوچینی جمعلب، وجودینی قاتیریب توردی و شو آنده بویرهگیده موزدېک بۉشلیقنی حس قیلدی، بیراق بیر اۉغیز هم آواز چیقرمهدی. دوکتور ایشینی توگهتیب، مایوردن نریراق توریب آلدی-ده، خوشموامیلهلیک بیلن بۉلمهسه-ده، هېچ قندهی کینهسیز دېدی:
– انه اېندی سیز بیزگه ییگیرمهتهلیک اۉلیک آدم رسمی توشیریلگن پولدن تۉلهیسیز-ده.
مایور جغ سویکلرینی غایچیرلهگنینی هیچ قیلدی. اونینگ کۉزلری جیققه یاشگه تۉلگندی. او اۉریندیققه آغریق تیشی آلیب تشلنگنلیگینی حس قیلمهگونچه نفس آلمهسدن اۉتیرهوېردی. نهایت، کۉز یاشلری آرقهلی بونی حس قیلدی. اېندی اونگه بېش کونلیک اضطرابلی تونلر بېگانه، چونکه او عذابلی آغریقلردن فارغ بۉلگندی. تېرگه باتیب چرچهب قالگن مایور اوزونېنگلی کۉیلهگینی توگمهلرینی یېچیب، شیمینی چۉنتهگیدن دسترۉمالچهسینی آلدی. اورېلیا اېسکاوېر اېسه اونگه دسترۉمالچهسی اۉرنیگه تازه متاع اوزهترکن:
– کۉز یاشلرینگیزنی ارتیب آلینگ، – دېدی.
مایور دوکتور نینگ طلبینی زودلیک بیلن بجا قیلدی. او ساووق تېرلشدن اېندی قهلتیرردی. اورېلیا اېسکاوېر قۉل یووهیاتگنیده چیناق نینگ یوقاری بورچهگیده چنگ باسگن اۉرگیمچک تۉریده بالهلهگن اۉرگیمچکنی و اۉلیک ههشارهتلرنی کۉردی. او آرقهسیگه اۉگیریلیب مایورگه دېدی:
– اویقوگه یاتیشدن آلدین نمکآب بیلن آغزینگیزنی چهیینگ.
مایور اۉرنیدن توریب توگمهسینی هم قدهمهسدن خیر دېیه اېشیک تامان یوررکن:
– حسابنی جۉنهتینگ، – دېدی.
– سیزگهمی، یا شهرچه مأموریتیگهمی؟ – اونی پول تۉلهمسدن چیقیب کېتهیاتگنی اورېلیا اېسکاوېر نینگ اېنسهسینی قاتیردی.
مایور آرتیگه هم قرهمهسدن اېشیکنی یاپدی و تشقریگی آینهدن کۉرینیش بېررکن، دېدی:
– بو سیز نینگ سلامینگیزگه یرهشه الیک.
چاپ اېتیلگن29.06.2015مولف ضياوز.اوز
انگلیس تیلیدن شېرزاد کامل خلیل ترجمهسی
